पाल्पा २, कार्तिक ।
पाल्पा जिल्लाका दश स्थानीय तहमध्ये पूर्वखोला गाउँपालिका स्वास्थ्य क्षेत्रको कार्यसम्पादनमा पहिलो बन्न सफल भएको छ । स्वास्थ्य कार्यालय पाल्पाले स्वास्थ्य सम्बन्धी विभिन्न सूचकका आधारमा कार्यसम्पादनमा पूर्वखोला गाउँपालिकालाई पहिलो घोषणा गरेको हो ।
आर्थिक वर्ष २०८१/८२ मा सम्पादित स्वास्थ्यसम्बन्धी गतिविधिका मुख्य सूचकहरूका आधारमा पूर्वखोला गाउँपालिकाले ६६.०५ अंक ल्याएर पहिलो बनेको स्वास्थ्य कार्यालय पाल्पाले जनाएको छ । स्वास्थ्य कार्यालय पाल्पाको आयोजनामा असोज ३० गते विहिबार र ३१ गते शुक्रबार आयोजित २०८१/८२ मा सञ्चालित कार्यक्रमहरूको वार्षिक समीक्षा तथा आर्थिक वर्ष २०८२/८३ को कार्यक्रम कार्ययोजना गोष्ठीको अवसरमा सूचकहरूको मूल्याङ्कन गर्दै पुरस्कृत गरिएको थियो ।
निस्दी गाउँपालिका ६५.३५ अंक ल्याएर दोस्रो बन्दा रैनादेवीछहरा गाउँपालिका ६४.९८ अंकका साथ तेस्रो स्थान हासिल गरेको हो । पहिलो, दोस्रो र तेस्रो स्थान हासिल गर्ने स्थानीय तहलाई पुरस्कारस्वरुप सम्मान पत्र प्रदान गरिएको छ । पुरस्कृत स्थानीय तहलाई लुम्बिनी प्रदेशका स्वास्थ्य मन्त्री खेमबहादुर सारुले सम्मान पत्र प्रदान गर्नुभएको थियो ।
पूर्वखोलाका स्वास्थ्य शाखा प्रमुख मोहन ढकालले आगामी दिनमा अझ प्रभावकारी र गुणस्तरीय सेवा प्रवाहका लागि सम्मानले प्रेरणा दिएको बताउनुभयो । उहाँले स्वास्थ्य सेवाको क्षेत्रमा स्वाथ्यकर्मीहरूको सामुहिक योगदानका कारण पूर्वखोला भएको भएको भन्दै आगामी दिनमा स्वास्थ्य सेवाको आवश्यक सुधारका लागि समेत निरन्तर सहयोग र सहभागिताको आवश्यक हुने औंल्याउनुभयो ।
