पाल्पा, परेवा ।
आज चैत्र २३ गतेदेखि सरकारी कार्यालय विहान ९ बजेदेखि खुलेका छन् । हिजो चैत्र २२ गते आइतबार बसेको मन्त्रिपरिषद् बैठकले गरेको निर्णय अनुसार आजदेखि देशभरका सरकारी कार्यालयहरू विहान ९ बजेदेखि बेलुका ५ बजेसम्म खुल्ला हुने भएका हुन् ।
चैत्र २२ गतेसम्म कार्यालय समय विहान १० बजेदेखि ५ बजेसम्म थियो । जाडोयाम –कार्तिक १६ गतेदेखि माघ १५ गतेसम्म) भने कार्यालय समय बिहान १० बजेदेखि बेलुका ४ बजेसम्म सञ्चालन हुन्थ्यो ।
मन्त्रिपरिषद् बैठकले इन्धन खपत घटाउनका लागि शनिबार र आइतबार दुई दिन बिदा दिने तथा सरकारी कार्यालय बिहान ९ बजेदेखि बेलुकी ५ बजेसम्म सञ्चालन गर्ने निर्णय गरेको थियो । यस सम्बन्धी निर्णय हिजो नै राजपत्रमा प्रकाशित भइसकेको छ ।
